ROXAS CITY -Ginkompirmar sang pamunuan sang Vallacar Transit Inc. nga ginakulang sila sang mga unit sang bus nga naga-biyahe padulong sa Iloilo bangud wala pa sang special permit.
Ini ang ginkompirmar ni Mars Bautista, controller sang Vallacar Transit Inc. sa Roxas City Integrated Transport Terminal sang mainterview sang Bombo Radyo.
Suno kay Bautista nga wala ginpasugtan nga magsulod sa terminal ang mga bus nga wala sang special permit.
Aminado ini nga madamo ang na-stranded nga mga pasahero bangud kulang ang naga-biyahe nga bus kag limitado lamang ang pasahero nga ginapasakay.
Gindugang pa ni Bautista nga ginalista sini ang mga nagahulat nga pasahero agud makasakay sa nagabalik nga bus.
Nagpasalig naman ang pamunuan sang Vallacar Transit Inc. nga ipaapas ang mga special permit sang mga buses nga wala makabiyahe subong nga adlaw.
Samtang halos duha naman ka oras ang ginhulat sang isa ka pasahero matapos nga na-stranded sa terminal.
Suno kay Anna sang Phil. Railway Street, Roxas City nga magapadulong kuntani ini sa syudad sang Iloilo apang wala kahingabot sa first trip.
Apang suno sa iya nga ginlauman naman sini ang mangin sitwasyon sang terminal sa tion nga magbalik na ang biyahe sang mga pampubliko nga salakyan.
