Mga Capizeño, nagakalipay kasunod sang pagkakuha sang 2 gold medals sang Capizeña shooter sa SEA Games 2019

ROXAS CITY – Nagakalipay sa karon ang mga Capizeño kasunod sang pagkakuha ni LCDR Marly Llorito-Martir sang bulawan nga medalya sa shooting competition sa nagapadayon sa karon nga 30^th South East Asian (SEA) Games.

Mahibaluan nga nakakuha sang bulawan nga medalya si Martir sa nasambit nga sporting event sa individual kag team-women category.

Sa interview sang Bombo Radyo sa utod ni Martir nga si Marie Liezel Llorito-Diawara, ginpahayag sini nga tuman ang ila nga pagpasalamat sang nabalitaan nga nagdaog sa iya ginpasakupan nga kompetisyon ang iya utod.

Suno diri nga bata pa lamang ang iya utod, nakitaan na nila ini sang abilidad sa pag-target bangud mahilig ini maghampang sang mga Pinoy street games kapareho sang ginbansagan nga ‘Taksi’ kag lastiko.

Mahibaluan nga si Martir ang tumandok sang Jagnaya, banwa sang Jamindan, Capiz.