ROXAS CITY – Nagadagsa karon ang pila ka mga Chinese nationals nga nakaba-se sa Vancouver, Canada sa mga botika ukon drugstores agud makabakal sang mga face masks nga ila pa nga ginapadala sa ila tagsa ka mga pamilya sa China bangud sa novel coronavirus.
Ini ang base sa report sa Bombo Radyo Roxas ni Bombo International Correspondent Mariz Dunton, tumandok sang Panit-an, Capiz kag nakaba-se karon sa Vancouver, British Columbia, Canada.
Suno kay Dunton, talalupangdon naman ang paghalong sang mga Canadians pinaagi sa pagsuksok sang mga face masks ilabi na sa mga public transports.
Nagalikaw man suno diri ang mga tawo sa pagpadulong sa mga pampubliko nga lugar bilang paghalong batuk sa nasambit nga balatian.
Mahibaluan nga una na nga nareport sang Toronto Public Health nga nakabaton sila sang impormasyon natuhoy sa pinakauna nga presumptive confirmed case sang coronavirus sa ila pungsod.
