KALIBO, AKLAN – Amat-amat na nga nakapauli sa Wuhan, China ang mga Chinese tourists nga nagbakasyon sa isla sang Boracay.
Ini ang ginkompirmar mismo ni Engr. Eusebio Monserate Jr., ang hepe sang Civil Aviation Authority of the Philippines (CAAP) sa Kalibo International Airport sang mainterview sang Bombo Radyo.
Suno kay Monserate, una na nga nakapauli sadtong Biyernes sang gab-i ang iban nga mga turista sakay sang Royal Air Philippines.
Ang masunod nga batch sang magapauli sa nasambit nga pungsod ang naka-schedule subong nga gab-i kag sa Lunes.
Suno sa opisyal nga duha ka mga airline companies ang nagpreparar sang apat ka mga flights agud makapauli ang mga turista nga Chinese nga nag-abot sa Kalibo International Airport sakay sang direct flight gikan sa Wuhan City.
Mahibaluan nga ang pagdagsa sang mga Chinese tourists sa isla sang Boracay ang bangud sang selebrasyon sang Chinese New Year.
Matandaan nga sadtong nakaligad nga Enero 23, Huwebes, kapin sa 135 pa ka mga Chinese ang nag-abot sa nasambit nga pahugpaan antes ginpatuman ang lockdown sa nasambit nga pungsod bangud sa 2019 novel coronavirus scare sa China.
Mahibaluan nga ang Pan Pacific Airlines kag Royal Air Philippines ang lunsay may yara sang direkta nga flights sa Wuhan City sa nasambit nga pahugpaan.
Gindugang pa ni Monserate nga mangin ang mga crew nga mga Pinoy sa chartered flight sang mga Chinese pauli sa China ang igapaidalom man sa thermal scanner kag ginpasiguro sini nga protektado man ang mga ini agud malikawan nga malatnan sang amo nga balatian.
