Ginpahanumdom sang Philippine Coast Guard (PCG) Station Northern Negros Occidental ang mga tag-iya sang mga beach resort nga sundon ang mga safety requirements agud malikawan ang aksidente kag maseguro ang kaluwasan sang mga bisita.
Ini kasunod sang pagkalumos sang student athletes nga sanday Rene Clert Baterbonia kag Divine Adili sang team-building activity sang Ateneo Men’s Basketball Team sa isa ka beach resort sa Dipaculao, Aurora sang Hunyo 8.
Suno kay Commander Artzell Anacan, iya ginpahayag nga ang Maritime Safety Services Unit (MSSU) sang PCG amo ang naga-inspeksyon sa mga coastal beach resort para masiguro nga nasunod ang mga safety standards.
Lakip sa mga kinahanglan nga kagamitan ang lifeguard kada 20 metros, lifeguard tower, binoculars, radyo ukon communication device, pito ukon whistle, kag mga life-saving equipment pareho sang lifebuoy ring kag iban pa nga floating devices.
