ROXAS CITY – Pagabuligan sang gobyerno ang mga frontliners sang coronavirus disease (COVID-19) sa probinsiya sang Capiz kag siyudad sang Roxas nga naga-eksperyensiya sang diskriminasyon.
Ini ang ginpasalig ni Capiz Governor Esteban Evan ‘Nonoy’ Contreras sa ginpatigayon nga press conference sang gobyerno-probinsiyal kaupod ang Provincial Health Office kag Department of Health.
Suno sa gobernador nga nakalab-ot na sa iya ang pila ka mga impormasyon natuhoy sa gina-ekperyensiya nga diskriminasyon sang mga frontliners ilabi na sang mga medical staff, nurses kag doctors.
Bangud diri suno sa opisyal, may gindesignar ini nga isa ka lugar nga mahimo ma-estaran sang tanan nga mga frontliners nga apektado bangud sang diskriminasyon sa ila tagsa ka mga ginapulian kag suportado man ang mga ini sang pagkaon kag iban pa nila nga kinahanglanon.
Nagpasalamat man ang gobernador sa mga pribado nga grupo kag indibidwal nga padayon nga nagabulig sa mga frontliners pinaagi sa paghatag sang ila mga kinahanglanon.
Sa nasambit man nga sinapol, nagpasalig si Roxas City Mayor Ronnie Dadivas nga indi pagpabay-an sang gobyerno sang siyudad ang mga frontliners kontra COVID-19.
Ginpahayag sang alkalde nga nagakadapat lamang nga buligan ang nasambit nga mga indibidwal bangud sa ila dako nga sakripisyo agud mapunggan ang paglapta sang coronavirus sa siyudad kag probinsiya.
Gindugang sang alkalde nga indi lamang sa mga boardinghouses ukon apartments sang mga frontliners nagakatabo ang diskriminasyon kundi mangin sa iban pa nga pampubliko nga lugar nga makasugata sila sang iban nga tawo.
