CAPIZ-Nagbaton sang ikatlo nga hugna sang tag-10 ka kilo nga bugas ang mga pumuluyo halin sa 11 ka barangay sa banwa sang Cuartero sa ginpatigayon nga distribusyon sang bulig sang Gobyerno Probinsyal sang Capiz sa Barangay Agdahon subong nga Oktubre 26, 2026.
Personal nga nagbisita sa lugar si Governor Fredenil H. Castro agud mangin kabahin sang paghatag sang bulig kag magkamusta sa mga benepisyaryo, lakip ang pagpamati sa ila mga kinahanglanon kag kahimtangan.
Ang mga benepisyaryo naghalin sa Barangay Agdahon, Mahunod-hunod, Putian, San Antonio, Carataya, Agnaga, Mainit, Maindang, Lunayan, Sinabsaban kag Balingasag.
Kabahin ini sang padayon nga programa sang Gobyerno Probinsyal sang Capiz, paagi sa Provincial Social Welfare and Development Office (PSWDO) kag Task Force Pagdumdum, nga nagatuyo sa paghatag sang bulig sa mga komunidad nga nagakinahanglan.
Ang pagpanagtag sang bugas nagaserbi nga dugang nga suporta sa mga panimalay nga nagaatubang sang pagmahal sang mga balaklon, samtang nagapadayon ang epekto sang krisis sa gatong kag enerhiya sa pang-adlaw-adlaw nga galastuhan sang mga pamilya.
Paagi sa sini nga inisyatibo, ginapaabot nga mabuligan ang mga benepisyaryo sa ila panguna nga kinahanglanon sa pagkaon kag maminusan ang kabug-aton sang ila galastuhan sa panimalay.
