CAPIZ-Gintalakay sa Provincial Development Council (PDC) Meeting nga ginpangunahan ni Governor Fredenil H. Castro bilang chairman sang konseho subong nga adlaw, Oktubre 16, 2026, ang mga mayor nga proyekto kag programa nga ginaplano sang Gobyerno Probinsyal sang Capiz para sa pagpauswag sang imprastraktura kag pagpalig-on sang serbisyo publiko.
Kabahin sa mga topiko ang Supplemental Annual Investment Program (SAIP) para sa tuig 2026 kag 2027, nga nagalakip sang nagkalain-lain nga programa, proyekto kag aktibidad sang probinsya.
Ginpahibalo man sa konseho ang mga update sa Master Plan kag Feasibility Study sang Panay River Basin Integrated Development Project (PRBIDP), lakip ang plano para sa rehabilitasyon sang Panay Fish Port sa Barangay Pawa, Panay, Capiz, kag konstruksyon sang Capiz General Hospital sa Barangay Malag-it, Pontevedra.
Gintalakay man ang mga mayor nga proyekto sang probinsya, lakip ang bag-o nga Kapitolyo Probinsyal sa Barangay Dinginan, Roxas City; Agora de Capiz; Villareal Stadium; Capiz Convention Center; kag Capiz Medical Center.
Ang mga ini nga proyekto kabahin sang mga plano sang Gobyerno Probinsyal para sa pagpauswag sang mga pasilidad, pagpalig-on sang serbisyo publiko kag pagsabat sa nagkalain-lain nga kinahanglanon sang mga pumuluyo.
Paagi sa Provincial Development Council, ginakoordinar kag ginatalakay ang mga programa kag proyekto nga ginatuyo nga mangin kabahin sang padayon nga pag-uswag sang probinsya sang Capiz.
