ROXAS CITY – Sa ikatatlo nga kahigayunan, ‘no show’ sa gihapon sa ginpatawag nga budget-deliberation sang Sangguniang Panlalawigan ang pila ka mga departments heads kag medical staffs sang Roxas Memorial Provincial Hospital (RMPH) kag iban pa nga district hospitals.
Mahibaluan nga kalakip sa gin-imbitar sang provincial board sa ila sesyon amo ang Provincial Adminstrator, Provincial Engineer, Provincial Budget Officer, Provincial Health Officer, Chiefs of Hospitals kag pila ka katapo sang RMPH.
Ini na ang ikatatlo nga kahigayunan nga ginpatawag ang nasambit nga mga indibidwal apang wala sa gihapon sila nagtambong.
Apang nagpadala lamang sang sulat si Provincial Administrator Edwin Monares kay Board Member Jonathan Sonny Besa nga nagasaad sang rason sang ila kapaslawan nga makatambong.
Nasaad sa sulat nga terminated na ang committee deliberation sa Annual Investment Program (AIP) 2020 kag ginakonsiderar naman nila ang mga komento sang miyembro sang provincial board natuhoy diri.
Nasaad man diri nga indi makatambong ang mga health officials bangud sa masako nga mga lihok batuk sa coronavirus disease (COVID-19).
Magasentro kuntani ang ginpatawag nga sesyon sa pagtalakay sang pondo ukon budget-deliberation sang gobyerno-probinsiyal partikular na ang pagpain sang pondo para sa mga ospital sa probinsiya.
Wala naman napunggan ni Board Member Mateo Hachuela nga maghatag sang komento natuhoy sa ginpadala nga sulat ni Monares.
Panindugan ni Hachuela nga wala pa matapos ang deliberasyon sang AIP bangud wala pa ini mapapasar sang legislative department.
Pag-abot naman sa rason nga masako ang mga health officials sa mga lihok batuk sa COVID-19, suno kay Hachuela mas nagakadapat pagid kuntani sila magtambong agud makadihon na sang pondo para sa mga ospital sa probinsiya kag mapaayo pa ang ila mga lihok batuk sa amo nga balatian.
