Hugot nga ginakontra sang Filipino Roblox Developers Association ukon FRDA ang panawagan nga bug-os nga ipagbawal ang online gaming platform nga Roblox sa Pilipinas.
Suno sa grupo, mas maayo nga tutukan sang gobyerno ang mga feature, online community, ukon communication channel nga posible ginagamit sa pag-engganyo sa mga kabataan nga maghimo sang pagpanakit ukon kapintas, sa baylo nga bug-os nga pagdili sa amo nga platform.
Ini ang reaksyon sang FRDA matapos magpahayag si Interior and Local Government Secretary Jonvic Remulla nga posible may impluwensya ang Roblox sa 14-anyos nga involved nga nadalahig sa school shooting sa Zamboanga sang Agosto 18.
Suno sa FRDA, bisan pa bug-os nga ipagbawal ang Roblox, indi gihapon sini mapunggan ang mga tawo nga nagapang-engganyo sa mga kabataan nga magbalhin sa iban nga online platforms.
Bangud madamo sang servers kag nagkalain-lain nga klase sang content sa Roblox, ginpahayag sang grupo nga kinahanglan anay mahibaluan kon ano gid nga partikular nga feature, community ukon communication channel ang may problema antes magpatuman sang bug-os nga pagbawal sa platform.
Ginhangkat man sang FRDA ang gobyerno nga magpagwa sang klaro kag konkreto nga ebidensya nga nagapakita sang direkta nga pag-angot sang Roblox sa amo nga insidente.
Ginkontra man sang grupo ang pahayag nga ang pag-record sang insidente gamit ang first-person point of view ukon POV nagakahulugan dayon nga ini ginsunod ukon gina sunod halin sa isa ka first-person shooter game.
Suno sa FRDA, indi awtomatiko nga nagakahulugan ang paggamit sang first-person point of view nga may pagsunod na sa isa ka video game. Natural lamang, suno sa ila, ang amo sini nga pamaagi sa pag-record, ilabi na kon isa lamang ka tawo ang nagakuha sang video.
Amo ini ang panindugan sang Filipino Roblox Developers Association samtang nagapadayon ang diskusyon parte sa posible nga pagdili sang Roblox sa Pilipinas.
