Nakatutok ang House prosecution panel sa preparasyon sang mga ebidensya nga igapresentar sa nagahilapit nga impeachment case trial batok kay Vice President Sara Duterte, samtang padayon ang pre-trial conference.
Sa interview sang Bombo Radyo kay House prosecution panel spokesperson kag Kabataan Party-list Representative Renee Co, iya ginpahayag nga nagpatigayon sila sang dugang nga “marking of evidence” para sa mga dokumento nga may koneksyon sa articles of impeachment, lakip na ang mga alegasyon sa paggamit sang confidential kag intelligence funds.
Suno kay Co, nag-submit man ang prosecution sang ila komento sa stipulation of facts agud mapadali ang proseso kag mapaspasan ang pagdinig sa impeachment court.
Samtang, wala pa sang klaro nga bag-o nga estratehiya nga nakita sa kampo ni Vice President Sara Duterte, para sa preparasyon sang duha ka kampo para sa actual nga trial.
