ROXAS CITY – Indi pa mapat-od kun san-o sayluhon sa Tanza Ville ang 12 ka mga pamilya nga biktima sang sunog sa Barangay VIII, Roxas City.
Sa interview sang Bombo Radyo kay Punong Barangay Castor Holce Bialen, iya ginpahayag nga may yara sang housing units sa Tanza Ville nga amo ang magaserbe nga relocation site sang mga nasunogan.
Suno kay Bialen, nagpadulong mismo si Mayor Ronnie Dadivas sa Barangay kag nakighinun-anon sa dugang nga mabulig sang gobyerno.
Pahayag niya, ginahitso na ang mga dokumento sang mga biktima nga kinahanglanon agud may yara na sang matiniran nga balay ang mga ini.
Sa subong, nagapabilin sa evacuation center sang Barangay ang pila ka mga pamilya.
Ginaalegar nga blower nga nakasaksak sa kuryente ang ginhalinan sang sunog nga nagluntad sang Hulyo 25 sa nasambit nga barangay.
