ROXAS CITY – Nagpalab-ot sang reklamo ang mga drivers kag operators sang Capiz 1st Transport Cooperatives sa chairman sang Committee on Transportation and Public Utilities sang Sangguniang Panlalawigan nga si Board Member Jonathan Sonny Besa angut sa mga colorum nga van nagabiyahe sa Roxas City Integrated Transport Terminal.
Suno kay Besa nga ginareklamo sang mga drivers kag operators sang mga van nga nagabiyahe sa Iloilo-Roxas kag Kalibo-Roxas vice versa ang mga colorum nga van nga nagabiyahe kag naga pick-up sang mga pasahero rason nga wala na sang may mabilin sa ila.
Magluwas pa diri ginareklamo man sang mga ini ang mga tourist franchise nga van nga naga-pick-up man sang mga pasahero sa nasambit nga terminal.
Ginpahayag ni Besa nga ang tourist drivers ang naka-park lamang sa mga hotels kag resorts ukon mga travel agency sa diin on call lamang mga ini kag indi mahimo nga makabiyahe sa terminal.
Nagtambong sa sinapol nga ginpatawag ni Besa ang administrador sang terminal nga si Mr. Victor Arcenas, ang chairman sang Committee on Transportation sang Sangguniang Panlungsod nga si City Councilor Gregory Albert Potato kag John Paul Arcenas, agud maghatag sang paathag angut sa mga reklamo sang driver kag operators sang mga van.
Nangin dinapit man nga bisita sa sinapol ang representante sang Land Transportation Franchising and Regulatory Board ukon LTFRB kag mga operators kag drivers sang van.
Samtang nakasugtan nga liwat magpatigayon sang sinapol sa masunod nga mga inadlaw kag ginalauman nga magatambong man ang iban pa nga agensiya kalakip na ang land Transportation Office (LTO).
