ROXAS CITY – Ginahulat nalang sang mga drivers sang pampubliko nga traditional jeepneys ang matrix nagikan sa Land Transportation and Franchising Regulatory Board (LTFRB) antes sila magpatuman sang dugang nga plete.
Sa interview sang Bombo Radyo sa pila ka mga dispatcher kag driver sang jeep sa Roxas City Integrated Transport Terinal, ginpahayag ni Elpedio Vipinosa, dispatcher sang Jamindan-Roxas City and vice versa nga wala pa sila nagdugang sa pagsukot sa ila pasahero bangud wala pa sila sang ginakaptan nga matrix.
Matandaan nga sandig sa gin-aprubahan sang Department of Transportation (DOTs), mangin P12 na ang minimum nga plete sa tradisyonal nga jeep, kag may P1.80 nga dugang sa kada succeeding kilometer.
Sa pihak nga bahin, P14 naman ang minimum sa modern jeepneys (mini-buses) kag dugang nga P2.20 sa kada succeeding kilometer.
Sa ordinaryo nga bus, P13 ang minimum, kag dugang nga P2.25 sa kada succeeding kilometer, kag sa air-conditioned bus, mangin P15 na ang minimum kag dugang nga P2.65 sa kada succeeding kilometer.
Nahibaluan nga epektibo ini subong nga adlaw sang Lunes, Oktubre 3, apang pahanumdom sang LTFRB nga indi magbayad sang panibag-o nga pletehan kun wala sang napaskil nga fare matrix ang ginasakyan nga pampubliko nga behikulo.
