May yara sang probable cause ang mga ebidensya nga ginpresentar sa ikatlo nga impeachment proceedings batok kay Vice President Sara Duterte sa hearing nga ginpatigayon sang House Committee on Justice.
Sa interview sang Bombo Radyo kay Former Kabataan Partylist Representative Raoul Manuel, iya ginpahayag nga  ginbuyagyag sa hearing sobra 600 ka ginaalegar kaduda-duda nga transaksyon nga nagapakita sang posible nga iregularidad sa paggamit sang pondo sang gobyerno, nga dapat seryoso nga aksyonan.
Suno kay Manuel, base sa mga pahayag kag presentasyon sa nasambit nga hearing, mabaskog ang tanan nga mga ebidensya sang impeachment complaints gani dapat padayunon ang proseso agud makapreparar man ang Senado para sa trial.
Pahayag pa niya, ang impeachment isa ka importante nga mekanismo agud masiguro ang kredibilidad sang isa ka opisyales, labi na sa tunga sang mga isyu nga ginahimo sang gobyerno kag sa indi husto nga paggamit sang pondo sang pungsod.
Nahibaluan nga lakip sa mga resource persons nga nag-atubang kag naghatag sang impormasyon sa hearing amo ang Anti-Money Laundering Council (AMLC) ,Office of the Ombudsman sa pagpanguna ni Ombudsman Jesus Crispin Remulla, kag anay Senador Antonio Trillanes IV, nga nagpaambit man sang ila mga pahayag kag panan-aw parte sa mga isyu..
Naglaum man ang natungdan nga sa pagpadayon sang proseso, mapanabat ang mga dapat manabat sa bisan ano nga mapamatud-an nga iregularidad.
