ROXAS CITY – Ginpanginwala karon sang mga empleyado sang isa ka dako kag kilala nga bangko sa siyudad sang Roxas nga kliyente kag nagautang sila sa ginbansagan ‘bigtime scammer’ nga si Angene Dapulano alyas Bubbles nga anay empleyado man sang isa ka bangko kag residente sang Barangay Milibili, Roxas City.
Ini ang ginpabutyag sang mga bank employees nga nag-atubang sa Bombo Radyo apang wala na lamang naghatag sang ila pangalan para sa ila man nga seguridad.
Mahibaluan nga pila ka mga empleyado sang bangko kag mga abyan ni Bubbles ang ginagamit sini nga pangalan nga kliyente sini ukon nagautang sa iya agud nga makaganyat sang mga maga-invest sang kwarta nga gamiton sa iya personal nga pautang.
Suno sa wala na ginhingadlan nga banker, ni-piso wala sila sang may gin-utang kay Bubbles sa baylo ang iban sa ila pa ang nagpautang diri kag nag-invest man sang dako nga kantidad sang kwarta.
Mahibaluan nga may duha ka nag-invest sang tag-P100, 000, isa nga nag-invest sang P50, 000 kag may mga nagpahulam sang credit card kay Bubbles bangud sa ila tuman nga pagsalig.
Suno pa diri nga nag-contact na sa ila si Angene apang kasubong sila pa ang ginapakonsensiya sini.
Ginpahayag sini nga ginhambalan sila ni Angene nga may malain ini nga himuon sa iya kaugalingon kun maglala pa ang sitwasyon.
Sa karon, luyag lamang sang mga investors nga mabalik ang ila nga kwarta bisan indi na pag-ihatag ni Bubbles ang interes.
