ROXAS CITY-Ginpanindugan sang pila ka mga empleyado sang Metro Roxas Water District (MRWD) nga dako ang mangin kapierdehan sang nasambit nga talatapan sa tion nga madayon ang plano nga pagbakal sang tubig sa isa ka pribado nga supplier agud mahatagan sang suplay nga tubig ang mga concessionaires sini.
Mahibaluan nga nakasugtan sang mga Board of Directors sang nasambit nga talatapan nga magbakal sang tubig sa isa ka pribado nga supplier sa balor nga P25 sa sulod sang 15 ka tuig.
Suno sa kay Maria Rosario Moses Alba nga dako ang mangin kaperdiehan sa talapatan sumugod sa tuig 2022 sa tion nga madayon ang nasambit nga plano.
Dako nga porsyento suno diri sang kagastuhanan sang MRWD ang magakadto sa pagbayad sa pribado nga supplier nga ginabulubanta P126 Milyon kada tuig.
Ginakahangaw-an ni Alba nga kun matabo, wala na sang mabilin nga pondo sa nasambit nga talatapan pag-abot sa tuig 2023.//
Ginakunsiderar ni Alba ang ideya nga mag-utang ang MRWD sang kapin P194 Milyon para sa pagrehab sang mga pasilidad para madugangan suplay sang tubig sa probinsiya.
Suno sa kay Alba nga mahimo ini sang nasambit nga talatapan nga mabayaran ang nasambit nga utang nga wala sang ipatuman nga rate increase sa mga kunsomidor.
Samtang mas ginapakamaayo ni Alba nga himuon nga amat-amat ang pagtipon sang kuwarta agud makatipon sang pondo sa sulod sang pito ka tuig agud amat-amat nga makay-o ang mga pasilidad sang MRWD.
