Ginkumpirma sang OIC Chief of Hospital sang Roxas Memorial Provincial Hospital ang pagfile sang leave of absence sang kapin 68 ka mga empleyado sang amo nga ospital bangud sa kapaslawan nga mahatag ang ila sweldo.
Ginpahayag ni Dr. Edmarie Tormon nga nabaton sini ang petition letter sang mga medical frontliners nga nagatrabaho sa RMPH nga ila dayunon ang ginfile nga leave of absence kun indi pa maaprubahan ang ila sweldo sa Oktubre 5, 2021.
Suno sa opisyal nga kinahanglan sang RMPH ang P25million nga pondo para maswelduhan ang mga empleyado sang ospital nga humalin pa sang bulan sang Agosto tobtob sa karon nga bulan sang Septiembre ang wala makabaton sang ila nga sweldo.
Isa sa ginakabalak-an ni Tormon nga pananglitan dululungan nga mag-leave of absence ang natungdan nga mga empleyado maapektuhan ang operasyon sang amo nga balay bululngan kag ma-collapse ang health care system sa probinsiya.
Bangud diri naga-apelar sila sa mga board members nga aprubahan na ang ginarequest nga supplemental budget sang RMPH agud indi mabutang sa alang alang ang health care system sang probinsiya.
