Padayon nga ginapasangkad sang mga eskwelahan ang ila kampanya kontra bullying kasunod sang nagluntad nga shooting incident sa sulod sang isa ka pampubliko nga eskwelahan sa Tacloban City nga ginapahayag posible may kaangtanan sa bullying.
Sa interview sang Bombo Radyo kay Ruth Barrios, Principal III sang President Manuel A. Roxas Memorial School (North), iya ginpahayag nga wala gid ginatolerar sang ila eskwelahan ang bisan ano nga sahi sang bullying.
Suno kay Barrios, padayon sila sa pagpatigayon sang mga symposium kag information campaign kontra bullying agud madugangan ang ihibalo sang mga estudyante parte sa negatibo nga epekto sini.
Dugang pa sini, ginahatagan man sang mga lecture kag orientasyon ang mga estudyante agud mahibaluan ang ila responsibilidad sa pagmintinar sang malinong, luwas kag bully-free sa eskwelahan.
