ROXAS CITY — Mas maayo pa gid kuntani suno kay Capiz Gov. Antonio Del Rosario nga magpaidalum man sa drug test ang mga estudyante antes sila magpa-enroll sa eskwelahan subong man ang mga volunteers sa gobyerno kaangay sang mga barangay health workers agud mapasiguro nga hilway sa iligal nga droga ang probinsiya.
Suno sa gobernador, ginapreparahan na subong sang probinsiya ang pagpaidalum sa drug test sa tanan nga opisyal kag empleyado sang gobyerno.
Apang nagpangabay sa iya ang chief of hospital sang Roxas Memorial Provincial Hospital nga si Dr. Jose Arancillo nga mahatagan sila sang dugang nga tinion agud mangin preparado sila kun diri patigayunon ang drug test.
Mahibaluan nga sang nakaligad nga tuig, sa ginpatigayun nga Provincial Peace and Order Council meeting, gin-adoptar sang konseho pinaagi man sa pagduso ni Del Rosario ang resolusyon nga nagaganyat sa tanan nga mga opisyal kag empleyado sang gobyerno sa probinsiya sang Capiz.
Sang damlag lang, nagpapanaog man sang direktiba ang Civil Service Commission sa tanan nga ahensiya sang gobyerno lakip ang mga local government units nga ipaidalum man ang mga empleyado sa mandatory random drug testing.
