ROXAS CITY – Naglab-ot na sa masobra 6,000 ka mga estudyante ang nagpa-enroll subong nga S.Y 2020-2021 sa Capiz National High School.
Ini ang ginpahayag sang Mrs. Ma. Rita Villareal sang mainterview sang Bombo Radyo Roxas.
Suno kay Villareal nga madamo ang nag transfer sa ila nga mga estudyante nga naghalin pa sa mga private schools.
Ginpahayag sini nga nangin maayo man ang resulta sang pagsugod sang klase sang mga estudyante sa nagkalain-lain nga mga learning modalities.
Dugang pa sini nga padayon sa gihapon ang ila pagpanagtag sang mga modules kun sa diin nagapakig-angut man sila sa mga barangay officials agud mahatag sa mga estudyante.
Samtang, ang iban naman nga mga estudyante nga yara pa nagapuyo sa iban nga mga kabanwahanan ang mahimo nga magkuha sang ila modules sa amo nga buluthuan.
Sa pihak sini, nagapadayon sa gihapon ang pag print sang mga modules para sa mga estudyante.
Ginklaro man ni Villareal nga tig-isa gid ka modules ang ginahatag sa mga estuyante.
Dugang pa sini nga nangin maayo man ang pagsugod sang online class apang mas ginpakamaayo sini nga kun mabudlay ang connection ukon signal sang mga estudyante mas maayo nga kun temprano pa lamang magsaylo na lamang sila sa printed modules.
Mahibaluan suno kay Villareal nga kadam-an sa mga estudyante ang nagkuha sang learning modalities nga self-learning modules kun ikumparar sa online class.
Samtang, padayon sa gihapon nga magamonitor ang mga manunudlo angut sa estado sang ila tagsa ka mga estudyante subong nga new normal education kadungan sang COVID-19 Pandemic.
