CAPIZ-Nagpatigayon ang Gobyerno Probinsyal sang Capiz sang kampanya sa environmental awareness nga nagasentro sa climate change kag solid waste management para sa mga estudyante sa banwa sang Maayon halin Oktubre 20 tubtob 22, 2026.
Ang aktibidad ginpangunahan sang Capiz Provincial Environment and Natural Resources Office (CaPENRO), sa idalum sang administrasyon ni Governor Fredenil H. Castro, sa pagpakig-angot sa Municipal Government of Maayon kag sa suporta sang Department of Education (DepEd) – Schools Division of Capiz.
Nangin kabahin sang kampanya ang Maayon Elementary School, Tepacla Elementary School, Florentina B. Degala National High School, Parallan Elementary School kag Tuburan National High School.
Paagi sa mga interaktibo nga diskusyon kag pagbinayluhay sang mga ideya, ginpaathag sa mga estudyante ang mga epekto sang climate change kag ang importansya sang husto nga pagdumala kag pag-dispose sang basura. Gin-agda man sila nga kilalahon kon paano ang ila adlaw-adlaw nga mga binuhatan makaapekto sa palibot kag kon paano sila makabulig sa pagpanalipod sang kinaiyahan.
Pinaagi sa sini nga kampanya, ginatuyo sang CaPENRO kag sang mga katuwang nga ahensya nga mapataas ang kaalam sang mga pamatan-on tuhoy sa responsibilidad sa palibot kag mapadasig sila sa pag-umpisa sang simple pero mapuslanon nga mga tikang, pareho sang pagbulag sang basura, paglikaw sa single-use plastics kag pagmintinar sang kalimpyo sa ila mga eskwelahan kag komunidad.
Ginapabug-atan sang inisyatibo nga ang pagpanalipod sa kinaiyahan nagakinahanglan sang aktibo nga pagpakigbahin sang tagsa ka indibidwal, ilabi na sang mga pamatan-on nga may importante nga papel sa pagpatuman sang mas responsable kag malungtaron nga mga pamaagi para sa palaabuton nga henerasyon.
