Roxas City, Capiz – Nagpakigbahin sang ila mga natun-an ang mga estudyante sang nagkalain-lain nga eskwelahan sa Boys and Girls 2025.
Sa interview sang Bombo Radyo kay Wesley Selda, Project Chair sang Boys and Girls week 2025 kag sanday Arden Rose Duno, Jashlyn Denise Buncalan, Bea Loreen Leano, Alextine Basulgan, Yzabella Aramcel Allianza kag Deniece Alipongan Doloso, ila ginpahayag ang mga eksperyensiya nga indi nila malipatan.
Suno sa ila, nadiskubre nila nga ang mga ulubrahon sang isa ka government official ang indi madali kag kinahanglan sang kaisog agud atubangon ang mga nagkalain-lain nga problema.
Pahayag pa nila, isa man ka daku nga prebilihiyo ang mangin kabahin sang pagbulig sa oras sang kalamidad kasubong sang natabo nga pagbinaha sa probinsya sang Capiz kun sa diin isa man sila sa nag-volunteer agud mas mapadasig ang pagtan-ay sang bulig.
Nahibaluan nga ang ini nga aktibidad ang gindihon sang Rotary Club Roxas.
Dugang pa sang natungdan, lauman nga magapadayon ang ila nga pagserbisyo apisar natapos na ang ila nga journey bilang counterpart sang mga government official.
