ROXAS CITY – Ginkompirmar ni Provincial Disaster Risk Reduction and Management Office (PDRRMO) Head Judy Grace Pelaez nga nakabalik na sa ila tagsa ka mga puluy-an ang mga evacuees nga ginpabiya sa mga coastal areas bangud sa posible peligro nga dala sang bagyo nga Tisoy.
Suno kay Pelaez nga halos nakapauli na ang tanan nga mga bakwit gikan sa magkatuhay nga mga kabaranggayan sa siyudad sang Roxas.
Gindugang pa sini nga nakapauli naman sa ila tagsa ka mga puluy-an ang mga evacuees gikan sa magkatuhay nga mga kabanwahanan sa probinsiya kalakip na diri ang sa banwa sang Panay, Pilar, President Roxas, Panit-an, kag Ivisan.
Gindugang pa ni Pelaez nga wala man sang mga evacuees nga naglain ang pamatyag bangud gintatap sang husto ang mga ini.
Tuman man ang pagpasalamat ni Pelaez sa mga pumuluyo bangud sa magsunod sa pre-emptive evacuation.
Dako man nga bulig suno diri ang hugot nga kooperasyon sang magkatuhay nga mga Disaster Risk Reduction and Management Offices (DRRMO’s) sa mga kabanwahanan, Municipal Social Welfare and Development Office (MSWDO), Capiz Archdiocesan Social Action Center (CASAC), Local Government Units (LGU’s) kag mga barangay officials.
Ginkompirmar man ni Pelaez nga kasunod sang ila hinun-anon ni Capiz governor Esteban Evan ‘Nonoy’ Contreras, balik na sa normal ang klase bwas nga adlaw sang Miyerkules, Disyembre 4.
Mahibaluan nga una nga ginbatak ang tropical cyclone wind signal no. 2 ang probinsiya sang Capiz bangud sa bagyo nga Tisoy.
Ginsundan ini sang pagnubo sa tropical cyclone wind signal no. 1 tubtob sa dalayon nga gindula ang tropical cyclone wind signal sa probinsiya sang Capiz.
