ROXAS CITY – Nagakinahanglan sang pagkaon kag tuig kag iban pa nga mga kinahanglanon personal ang mga pumuluyo sang Barangay VII nga yara sa evacuation center bangud sa padayon nga malain sang tyempo.
Sa interview sang Bombo Radyo kay Barsilita Arabia 70-anyos, ginpahayag sini nga nagpasimpalad siya nga nagpalapit sa evacuation center agud makakuha sang makaon sang iya pamilya bangud ang iya sini bana kag anak nabilin sa ila puluy-an.
Suno kay Arabia, mabudlay sa ila nga mga residente ang ila subong naeksperyensyahan nga lapaw sa tuhod nga baha dala sang Bagyong Kristine.
Sa seperado naman nga interview kay Merlinda Azuro, ginsiling sini nga 3 na sila ka adlaw nga nagatinir sa evacuation center gani nagakinahanglan na sila sang bulig para sa ila pagkaon, tubig, kag kinahanglanon sa pang-adlaw-adlaw ilabi na sang bulig medical sa mga kabataan kag katigulangan nga may yara sang bulong nga maintenance.
Mahibaluan nga yara sa masobra 10 ka mga pamilya ang nagapabilin sa karun sa Barangay Hall bilang evacuation center sa ila nga lugar.
