ROXAS CITY – Nagakahubsan na karon sang face masks kag hand sanitizer sa pila ka mga botika kag drugstores sa Hongkong bangud sa novel coronavirus.
Ini ang base sa report sa Bombo Radyo Roxas ni Bombo International Correspondent Merlie Buño Protacio, tumandok sang Barangay Milibili, Roxas City kag nakaba-se karon sa Hongkong West Island Resort.
Suno diri hugot sila nga ginadumilian sang ila nga employer nga magpadulong sa mga pampubliko kag matawo nga lugar agud makalikaw sa nasambit nga balatian.
Ginpahayag pa sini nga may pila man ka mga public libraries, museums kag resorts ang temporaryo nga ginpasarado.
Apisar nga may kompirmado na nga kaso sang nasambit nga balatian sa nasambit nga pungsod nagapabilin naman nga positibo ang mga Pinoy kag nagadoble-halong agud indi malatnan sang nasambit nga balatian.
