ROXAS CITY – Nagakaubos na ang pasensiya sang administrador sang Teodoro Arcenas Trade Center (TATC) sa mga fish vendors bangud sa ila indi pagsunod nga mapabilin ang kalimpyo sang bag-o renovate nga fish section.
Sa interview sang Bombo Radyo kay Mrs. Heloise Mendoza, ginpahayag sini nga plano na kuntani sini nga ipauntat ang pagpanghimbis sa isdaan matapos nga apat ka mga truck sang basura ang nakuha sa mga kanal.
Nag-abot man sa punto nga ginbisitahan na ni Mayor Ronnie Dadivas ang merkado kag ginpahanumdom ang mga fish vendors nga ginhatagan sila sang komportable kag malimpyo nga puwesto, kuntani ila ini nga atipanon kag ipabilin ang katinlo.
Bangud sa promisa sang mga vendor nga magasunod sila sa pagsulondan sang merkado, kag indi na magliwat sa paghaboy sang himbis kag iban pa nga higko sang isda kag basura sa kanal, indi na pagdayunon sang administrador ang nasambit nga pagbawal.
Sa karon, naobserbahan na ni Mendoza nga naghagan-hagan na ang basura sa merkado.
