ROXAS CITY – Ginkalipay sang mga fish vendors ang pagtakop na sang pagpatuman sang closed-fishing season nga ginpatuman sang Bureau of Fisheries and Aquatic Resources (BFA).
Sa paglibot sang Bombo Radyo News Team sa mga merkado-publiko, nakit-an ang bugana nga suplay sang mga isda nga una nga gindumilian nga mahulik sa Visayan Sea sandig sa Fisheries Administrative Order 167-3.
Suno kay Manang Irene, isa ka fish vendor, kasunod sang pagtakop sang implementasyon sang amo nga laye, ang pagbalik sang ila regular nga kita sa pagpamaligya sang isda.
Ginpahayag pa sini nga nagnubo naman ang presyo sang ila baligya bangud sa bugana nga suplay sang isda.
Matandaan nga tatlo ka bulan nga ginpatuman ang nasambit nga pagsulundan nga nagsugod sadtong Nobyembre 15, 2019 kag nagtakop sang Pebrero 15, 2020.
Base sa nasambit nga laye, hugot nga gindumilian ang pagpanakop sang mga isda nga Sardines, Herring kag Mackerel sa kadagatan nga sakop sang Visayas.
Ini agud nga mahatagan sang panahon ang amo nga klase sang isda nga makapangitlog kaangay sang “lupoy,” “silinyasi,” linatsay” ukon “manansi” sa porsyon sang Visayan Sea.
