Ginkilala kag ginpasalamatan ni Senate Committee on Health Vice Chairman Senator Christopher “Bong” Go ang mga Pilipino nga padayon nga nagaserbisyo kag nagapangabudlay bisan pa sa malain nga kahimtangan sang panahon.
Kasunod sang pahibalo sang Philippine Atmospheric, Geophysical and Astronomical Services Administration (PAGASA) parte sa posible nga pagbalik kag pagkusog sang habagat sini nga semana, nanawagan si Go sa publiko nga unahon ang ikaayong lawas kag maghalong, ilabi na sa paglusong sa baha agud malikawan ang mga balatian pareho sang leptospirosis.
Nagpaabot man sang pagdayaw ang senador sa mga doktor, nurse, health workers kag medical staff nga padayon nga nagahatag sang serbisyo sa mga ospital bisan ang iban sa ila mismo naapektuhan sang baha sa ila mga puluy-an.
Ginkilala man niya ang sakripisyo sang mga rescuer, emergency responders kag iban pa nga frontliner nga nagaatubang sang katalagman sa tion sang kalamidad agud masiguro ang seguridad sang mga apektado nga komunidad.
Samtang, ginpaambit ni Go ang iya personal nga eksperyensya nga nagpakita sang propesyonalismo sang mga Pilipino nga manggagawa.
Suno sa senador, ang iya commercial flight pakadto sa Davao City gin-divert sa Cebu bangud sang mabaskog nga turbulence kag zero visibility nga epekto sang malain nga panahon.
Gindayaw ni Go ang madasig nga pagdesisyon, pahibalo kag pagpasiguro sa seguridad sang piloto kag flight crew nga gin-una ang kaluwasan sang tanan nga pasahero.
Pagkatapos sang pila ka oras, hilway nga nakalapag sa Davao ang eroplano. Nagpaabot man sang mainit nga pagpasalamat ang mga pasahero sa mga tripulante antes sila nagpanaug sa eroplano.
Sa tunga sang mga kabudlay nga dala sang malain nga panahon, padayon nga nagapakita sang kaisog, dedikasyon kag propesyonalismo ang mga Pilipino nga nagaserbisyo para sa kaluwasan kag kaayuhan sang tanan.
