ROXAS CITY – Liwat nga nagpasimpalad nga magpila sa tagtaganay sang educational assistance para sa student-in-crisis ang pila ka mga ginikanan, subong nga ika-lima nga hugnat sang payout, Setyembre 17, nga ginpatigayon sa SM City-Roxas.
Sa interview sang Bombo Radyo kay ‘Agnes’ nga nagikan sa Burias, Mambusao, ginpahayag sini nga mga alas-5:30 sang aga, yara na ini sa amu nga mall agud sa pagpila, apisar nga wala sang maipakita nga text message nagikan sa DSWD.
Ginpanindugan sini nga suno diri, nabatian niya ang pahayag ni Atty. May Castillo nga prayoridad ang nagpila sadtong Agosto 20, sa Villareal stadium.
Aminado ini nga wala siya nakuhaan sang pangalan kag contact number ssadto nga tinion bangud naglaong nga magpahingi ang staff sang DSWD kag wala na magbalik.
Apang, nag-register man ini online kag tubtob sa karon, wala ini makabaton sang mensahe nagikan sa ahensya.
Nahibaluan nga may duha ka mga kabataan sa elementarya si ‘Agnes’ kag naga-eskwela man ini sa Kolehiyo.
Kuntani, dako nga bulig ang amu nga kuwarta kun makaluy-an siya sang DSWD.
Sa pihak nga bahin, may nagpadulong man sa talatapan sang Bombo Radyo nga duha ka Iloy nga nagikan sa banwa sang Panay, kag nagpabutyag sang ila pagkadimasya bangud nagpasimpalad man ang mga ini sa pagpila, apang sa ulihi, wala sila gin-akomodar sang DSWD.
