ROXAS CITY – Indi sa gihapon makapati ang Capizeña student nga mangin topnotcher ini sa ginpaguha nga resulta sang 2019 Agriculturist Licensure Examination.
Sa exclusive interview sang Bombo Radyo kay Layka Aguro Servidad sang Barangay Tiza, Roxas City, ginpahayag sini nga nasurpresa siya sang ginhambalan sang iya mga abyan sa Central Philippine University nga nagpangatlo ini sa nasambit nga pasinawan nga nakakuha sang 88.83%.
Suno sa iya nga naghilibion ini sa tuman nga kalipay bangud wala niya ginalauman nga magapangibabaw siya sa masobra 13, 000 ka mga estudyante nga nagkuha sang licensure exam.
Ginpahayag sini nga tuman ang iya nga pagpasalamat sa Diyos kag sa iya nga pamilya kag abyan bangud sa ginpabatyag nga suporta sa iya.
Aminado man ini nga indi nangin mahapos ang iya nga inagihan sa pagtuon tubtob sa ini ang makatapos sa kolehiyo.
Apang bilang isa ka agriculture student, dako ang impluwensiya sa iya sang iya mga ginikanan nga lunsay anay empleyado sang Department of Agrarian Reform (DAR).
Sa karon ginatutukan ni Servidad ang iya nga pagtuon sang Veterinary Medicine sa Nueva Ecija.
