ROXAS CITY – Naglab-ot na sa 209 nga mga housing unit ang ginpasarado na sang National Housing Authority kaupod ang Lgu Panay sa Poblacion Ilaya, Panay, Capiz. Ini ang kasunod sang nagapadayon nga pagsurvey sa lugar agud mapamatud-an kun may yara sang matuod nga naga-istar sa isa ka unit.
Sa interview sang Bombo Radyo kay Mr. Jessie Baes Municipal Planning Officer, ginpahayag sini base sa ila ihibalo may yara sang pila ka mga pumuluyo nga temporaryo pa lamang nga gina-istaran ang unit bangud ginakay-o pa kag nanari-sari pa nga mga rason.
Suno kay Baes, kalabanan sa mga unit nga ila ginpasarado ang wala sang record kag indi matuod nga residente sang banwa sang Panay kag ang iban ginapabay-an lamang nga wala na ginaistaran sang pila ka bulan Bangud sini madamo nga mga residente ang nagpadulong sa opisina sang ila Local Government Unit (LGU) agud magpalab-ot sang ila mga reklamo.
Dugang pa ni Baes nga kinahanglan lang nila ipresentar ang mga papeles nga nagapamatuod nga sila ang tag-iya sang unit kag sa ila ini gin-award kag hulaton kun anu ang mangin suhestyon kag sabat sang ila alkalde, chairman sang Local Inter Agency Committee (LIAC) kag pila ka mga miyembro agud pamatian ang ila tagsa ka mga hiligut-anon.
Ginklaro man sini nga wala sang pinilian ang pagpasara sa housing unit sa pagkamutuod suno diri may pila man ka mga tinawo sang opisyal ang ginpasarado ang ila puluy-an.
Tinutuyo lamang suno diri sang ila pagpasara sini agud mangin lehitimo ang paghatag sang housing unit sa isa ka tag-iya.
Sa karun ginahulat na lamang nila ang pinal nga kopya sang acceptance nagikan sa National Housing Authority (NHA) kag matur-over na sa ila.
Matandaan nga may ara sang pagsinapol sa tunga sang LGU Panay kag NHA kung sa diin nagapangayo na sang pinal nga listahan sang aktwal nga nagaistar sa Panay Ville ang National housing Authority.
