ROXAS CITY – Nagdangat na sa mas o menus 9,000 ang numero sang mga ido kag kuring nga nabakunahan sang anti-rabies sa bug-os nga probinsya sang Capiz.
Ini ang ginpahayag ni Dr. Cheyz Descalsota, Veterinarian III sang Office of the Provincial Veterinary (OPV) sang mainterview sang Bombo Radyo.
Suno diri, nagsugod ang mass vaccination sang Pebrero tubtob sa katapusan sang Summer, sini nga tuig, kun sa diin nagpadulong ang hubon sang OPV sa nanari-sari nga LGUs sa probinsya.
Samtang, ginpahayag man ni Dr. Descalsota nga may yara sang isa ka confirmed case sang Rabies sa ido, ang narekord sa probinsya, kag nagikan ini sa Roxas, kag ang apat ang suspected cases.
Aminado man ang OPV nga may mga kaso sang rabies nga wala ginaparekord sang mga tag-iya, sa ila LGU.
Dako man suno diri ang pagpanghangkat sa ila bahin, ang pagdamo sang populasyon sang ido kag kuring ilabi na ang layaw nga indi bakunado.
Paalinton sang nasambit nga talatapan nga bakunahan ang nagaedad tatlo ka bulan pataas nga ido ukon kuring, mangin responsable nga pet owners pinaagi sa pag-atipan sang maayo kag indi pagpabay-an nga mangin layaw ang ila kasapatan.
