ROXAS CITY – Pagasuguran na sa masunod nga semana sang City Agriculture’s Office ang pagpangkakas sa mga illegal structures sa Panay River nga sakop sang siyudad sang Roxas.
Ini ang ginpahayag ni Regulatory Officer Rizalde Astrolabio sang mainterview sang Bombo Radyo.
Suno kay Astrolabio nga una na sila nga nag-inspeksiyon sa kasubaan nga sakop sang siyudad kalakip diri ang Culajao River, Culajao-Cogon River, Cadimahan kag Palina River subong man ang Lawaan Creek.
Magalibot man ang hubon sa kasubaan nga sakop sang Talon, Balijuagan, Punta Tabuc, Mongpong, Punta Cogon, kag Banica agud makuha ang mga illegal structures.
Nahibaluan nga masobra sa 200 ka illegal fishing structures kaangay sang saluran, surambao kag indi lisensyado nga fish cages ang nakit-an sa suba apisar nga hugot ini nga ginadumilian.
Matandaan nga una naman nga ginpangkakas sang mga tag-iya ang ila illegal structures sa pila ka mga lugar sa siyudad kasunod sang pagpadala sa ila sang Notice of Demolition.
