Narekober sang mga pulis ang madamo nga mga iligal nga armas sa balay nga ginapanaguan sang suspek nga nagluthang-patay kay Police Captain Rian Fuentes Ampoyos, Platoon Leader sang 3rd Platoon, 1st Capiz Provincial Mobile Force Company.
Nahibaluan nga si Ampoyos ang ginpatay sang sulod sang isa ka KTV Bar sa Barangay Binuntucan, Pontevedra, Capiz sang Hulyo 20, 2026.
Samtang ang suspek naman nga naaresto amo si Leonil Deocampo, 28-anyos, residente sang Barangay Bungsuan, Dumarao, Capiz.
Sa interview sang Bombo Radyo kay Police Lieutenant Col. Francisco Paguia, Acting Force Commander sang 1st Capiz Provincial Mobile Force Company, iya ginpahayag nga maserbe sila kuntani sang warrant of arrest kay Juvy Bagares sa Barangay Poblacion Ilawod, Pontevedra, Capiz.
Sang amo nga tion, wala sila Bagares kag natyempuhan nga nagapanago sa amo nga balay si Deocampo rason nga ini ang naaresto man sa diin nagtuyo pa ini kuntani nga magpalagyo.
Magluwas diri, naaresto man ang live in partner ni Bagares nga si alyas Joy kag isa pa gid nila ka kaupod sa balay ‘In flagrante delicto’ ukon naaktuhan mismo nga naghaboy sang armas sang nag-abot ang mga pulis.
Sa balay ni Bagares, nakuha ang nagkalain-lain nga mga armas kag bala nga ginalakipan sang 9mm Pistol, M16 Rifle, 38 Caliber Revolver, .45 Caliber Pistol kag isa ka fragmentation grenade.
Natukiban man nga madugay na nga nagapanago si Deocampo sa balay ni Bagares rason nga nagapangatubang ini sang kaso nga Harboring of a Criminal kag Illegal Possession of Firearms and Explosives.
