ROXAS CITY-Ginkompirmar sang Punong Barangay sang Barangay Bun-od ,Cuartero, Capiz nga may yara sang rekord sa barangay ang biktima nga may yara sang diperensiya sa paminsaron nga ginkastigo-patay sang tatlo ka mga pamatan-on sa nasambit nga lugar.
Suno kay Punong Barangay Roberto Francisco nga may mga nabalhag nga reklamo sa ila nga barangay batuk sa kay Juan Esperiano natuhoy sa pagpangawat sini sang mga tanum sang mga residente.
Ginpahayag sini nga gindala na si Esperiano sa isa ka mental facility sa siyudad sang Iloilo sang tinalikdan nga mga tinuig apang wala sa guihapon nag-ayo bangud wala sang sarang ibakal ang mga himata sang iya ginatumar nga bulong.
Samtang ginkompirmar man ni Francisco nga ang duha sa tatlo ka mga suspetsado sa pagpatay sa biktima ang lunsay may mga rekord sa barangay.
Ginapahayag ni Francisco nga may mga reklamo sang pagpangawat ang duha sa tatlo ka mga suspek rason nga indi naman bag-o para sa ila nga ma-imbolbar ang mga ini sa mga kinagamo sa barangay.
Matandaan nga ginkastigo patay ang nasambit nga biktima sang tatlo ka mga suspek nga sanday Christian Herosa 19-anyos, Edjay Bon Golviogo 18-anyos kag kaugalingon nga pakaisa sang biktima nga si Neil Espiriano.
