ROXAS CITY – Nakabaton sang tig-P2,000.00 nga financial assistance, ang pila ka mga fisherfolks nga apektado sang Paralytic Shellfish Poison (PSP) ukon toxin red tide sa probinsya sang Capiz subong man ang pila ka mga Barangay Tanod.
Sa interview sang Bombo Radyo kay Board Member Jose Fulgencio “Pepe” Del Rosario, ginpahayag sini nga nakit-an niya ang problema sang mga mangingisda kag manugpanginhas sa probinsya dala sang red tide.
Suno kay De Rosario, isa ini sa mga rason nga nagpalapit kag nagpanagyo siya sang bulig sa talatapan ni Congressman Howard Guinto sang Pinuno Party List.
Mahibaluan nga yara sang kapin P5.6-M nga pondo ang igapanagtag sa 2,800 nga mga benepisyaryo sa bug-os lamang nga primero distrito.
Kalakip sa mga banwa nga nahatagan sang financial assistance ang banwa sang Maayon, kung sa diin 200 ka mga resipyente ang nakaganar.
Matandaan nga sadtong tinalikdan nga semana, naghatag man ang Pinuno Partylist sang 2,200 food packs sa mga apektado sang red tide sa syudad sang Roxas.
Kadungan sini, gintinguhaan man nila suno diri nga mahatagan sang ayuda ang mga Barangay Tanod subong man ang mga BHW’s bangud indi supesyente ang insentibo nga ginahatag sa ila.
Samtang, natalana naman nga mahatagan ang banwa sang Panitan, Pilar kag Panay sang nasambit nga financial assistance.
