ROXAS CITY – Wala na ginapasulod sa probinsiya sang Capiz ang mga indibidwal nga gikan sa probinsiya sang Iloilo.
Ini ang na-obserbahan sang Bombo Radyo News Team sa ginapatuman nga health border checkpoint sa boundary sang duha ka probinsiya sa Barangay Aglalana, Dumarao, Capiz.
Mahibaluan nga ang nasambit nga checkpoint ang kabahin sang ginapatuman nga lihok agud mapunggan nga makasulod sa probinsiya ang coronavirus disease (COVID-19).
Ini ang nasaad man sa ginpapanaog nga Executive Order No. 20, series of 2020 ni Capiz Governor Esteban Evan ‘Nonoy’ Contreras.
May mga exemptions naman sa amo nga pagsulundan kun sa diin ginapahanugutan nga makasulod sa Capiz ang mga empleyado sang gobyerno; indi sang taga-Capiz apang diri nagatrabaho; mga medical personnels, health workers kag humanitarian workers; mga pasyente nga nagapa-chemotheraphy kag hemodialysis sa Capiz; kag mga negosyante ukon bolante sa baylo nga ma-comply sang mga ini ang pila ka mga rekisitos nga ginapangayo sa ila.
