Yara na sa maayo nga kahimtangan ang mga biktima kag padayon ang imbestigasyon sang mga katapo sang kapulisan sa natabo nga vehicular incident sa Barangay Binuntucan, Pontevedra, Capiz.
Ang driver sang una nga salakyan ang ginamaneho ni Alyas “Mayong” 61-anyos, residente sang Brgy. Sangkal, President Roxas, Capiz.
Ginkilala ang driver sang tricycle nga si alyas “Winwin,” 54-anyos kag residente sang Barangay Tabuc, Pontevedra; mga sakay sini nga sanday “Alvin”, 32-anyos; “Lynlyn”, 37-anyos; kag ang 4-anyos nga bata residente sang Brgy. Binuntucan, Pontevedra.
Ang isa pa gid ka salakyan ang ginamaneho ni Alyas “Tonton” 39-anyos residente sang Brgy. Balatucan, Panit-an, Capiz.
KAg ang katapusan nga salakyan ang ginamaneho ni Alyas “Dindin” 31-anyos residente sang Brgy. Ilawod, Pontevedra.
Sa interview sang Bombo Radyo kay Police Captain Ma. Fe Umiten, hepe sang Pontevedra Municipal Police Station, iya ginapahayag nga samtang gina subay ang nasambit nga dalan ni Alyas “Winwin” ( Driver 2) hinali nalang ini nga ginbunggoan sa likod sang salakyan ni Alyas “Mayong” (Driver 1) nga naga sunod sa iya.
Bangud sa mabaskog nga impact sang pagkabunggo, nadulaan sang control sa pagmaneho si Alyas “ Winwin” kag lumapaw ini sa pihak nga lane kag nabunggoan ang kasugata sini nga salakyan nga ginamaneho ni Alyas “Tonton” kag Alyas “ Dindin”.
Madasig nga ginrespondehan ang mga sakay nga nag-angkon sang pilas sa nagkalain-lain nga parte sang ila lawas kag gindala sang nagkalain-lain nga ospital.
Sa subong, nagapabilin sa kustodiya sang Pontevedra Municipal Police Station ang driver sang mga salakyan lakip na ang ila nga mga salakyan para sa nagakaigo nga disposisyon samtang, ginahulat kun may yara sang settlement nga matabo.
