Nagalab-ot na sa 19 ka tawo ang napatay sa panibag-o nga air strikes sang Israel sa Lebanon.
Suno sa Health Ministry sang Lebanon, napulo sa mga napatay lakip na ang tatlo ka mga kabataan kag tatlo ka mga babaye ang napatay matapos nga naigo sang pagpamomba ang isa ka balay sa banwa sang Deir Qanoun.
Narekord ang bag-o nga casualties wala pa isa ka semana matapos gin-anunsyo sang Estados Unidos sang Amerika nga nag-ugyon ang Lebanon kag Israel nga palawigon ang ceasefire sa sulod sang 45 pa ka adlaw samtang natalana naman nga ibalik ang istoryahanay sang duha ka bahin umpisa sa Hunyo.
Sa pihak sang ceasefire extension, ang Israel kag Hezbollah padayon nga nagbayluhanay sang mga pag-atake, ilabi na sa southern Lebanon.
Base sa pinakaulihi nga data sang health ministry, naglab-ot na 3,000 ang kadamuon sang napatay sa Lebanon bangud sa airstrikes sang Israel sa putukputukan sang inaway sa tunga nila kag sang Hezbollah halin sang Marso subong nga tuig.
