ROXAS CITY – Nagdugok ang mga investors sa talatapan sang National Bureau of Investigation (NBI) Region 6 sa Iloilo kasunod sa pagpasaka sang kaso nga syndicated estafa sa CEO sang 25 days double your money investment scheme nga si Junelyn Obamos Gregorio kag sa apat ka iban pa.
Madamo nga mga investors nga gikan sa Capiz, Iloilo kag Aklan ang personal nga nagpadulong sa talatapan sang NBI agud makita kag ma-estorya si Gregorio kag mapamangkot kun diin na ang ila investment.
Ginpahayag nga ginapanginwala ni Gregorio nga yara sa iya ang investment money sang mga investors nga nagpay-in kag gintudlo sini si certain Shenilyn nga responsable sa mga investments sang mga investors.
Apang nagapati ang mga investors nga nakabaton na sang pay-out ang mga kilala kag dalagkuan nga mga investors kag makaluluoy ang mga naulihi.
May pila man ka mga investors nga nagasiling nga posible gin-invest man ni Gregorio ang investments sa double your money investment scheme ni Don Chiyuto.
Nagapati man ang iban nga mga investors nga wala na sang kuwarta si Gregorio bangud bisan P10,000 nga pay-in ang ginakuha sini.
Samtang ginabulubanta nga P30-70 milyones ang investment nga ginalagas kay Gregorio sang mga investors nga nagdangup sa talatapan sang NBI matapos makalab-ot sa ila ang impormasyon nga ginpasakaan na ini sang kaso nga syndicated estafa.
Sa pihak nga bahin malapnagon karon ang video nga kuha sa puluy-an ni Gregorio sa Barangay Tiza, sining syudad.
Makita sa video si Gregorio kag ang lalaki nga ginaalegar isa ka abogado nga naga-estoryahanay kag ang kasubong paghikap sa pribado nga bahin sang CEO sang 25 days double your money investment scheme.
Apang sa pagpakig-angut sang Bombo Radyo sa amo nga abogado, gindepensa sini kag ginklaro nga wala sang paghikap kay Gregorio nga natabo.//
Ginakuha lamang sang abogado ang iya bracelet nga gin-alegar sini ginkuha ni Gregorio.
