ROXAS CITY – Desidido karon ang mga investors sang 25 Days Double your Money Scheme nga magpasaka sang panubungon kay Junelyn Gregorio, isa sa duha ka nagapadalagan sa amo nga investment scheme sa syudad sang Roxas.
Sa exclusive interview kay Dodoy, isa sa mga investors, ginpahayag sini nga kasubong ginatug-anan lamang sila ni Gregorio nga ihatag ang P4.8 million nila nga investment.
Suno sa tagreklamo nagpadulong sila sa balay ni Gregorio dala ang demand letter agud maklaro sa iya kun san-o sila balikan sang ila investment.
Apang wala gid sila ginpasulod kag wala ini nagguwa agud atubangon sila nga mga investors.
Ginpahayag ni Dodoy nga luyag nila kuntani nga maatubang si Gregorio nga amo ang ila ginhatagan sang ila investment agud mapasikto ini kun ano nga petsa sila balikan para may isabat man sila sa iban nila nga mga kaupdanan nga investors.
Aminado ini nga makaduha siya ka beses nga nakapay-out apang gamay pa lamang sadto ang ila investment bangud nagasugod pa lamang sila.
Gin-ako sini nga naganyat sila sang iya kaupdanan nga mag-invest bangud sa promo nga 15 days.
Samtang ginganyat ni Dodoy ang iban nga mga investors nga magguwa kag magreklamo kag maghimo sang anuman nga tikang agud mabawi ang inyo investment.
