JAMINDAN, CAPIZ – Nagaamat-amat na hubas ang tubig sa pila ka kabarangayan nga ginbaha bangud sa mabunok nga ulan sa banwa sang Jamindan.
Ini ang ginkumpirmar ni Jamindan Vice Mayor Lemuel Aran Vestidas sang ma-interview sang Bombo Radyo.
Suno kay VM Vestidas nga alas 10:00 kagab-i Nobyembre 3 nagsugod ang gulpyada nga pagbunok sang ulan tubtob kaina alas 5:00 sang aga Nobyembre 4.
Bangud sini ginpakamaayo sang LGU Jamindan nga i-suspend ang klase sa pampubliko kag pampribado nga buluthuan kag subong man wala man sang opisina sa pampubliko nga opisina subong nga adlaw sang Lunes, Nobyembre 4, 2024.
Naglab-ot naman sa 11 ka pamilya nga nagikan sa Brgy. Poblacion ang nag-evacuate bangud sa pagbinaha nga naeksperyensyahan.
Sa karon apisar nga nagaamat-amat na hubas ang tubig apang may pila pa ka kabarangayan nga indi maagyan ang dalan partikular sa boundary sang Brgy. Fe kag Brgy. Esperanza subong man sa portion sang Brgy. Jagnaya.
