Nagapadayon ang bug-os nga koordinasyon sang mga barangay officials sa Roxas City sa kapulisan bilang suporta sa Project Restrict, Track and Turn-In ukon RTT 3389 kag Project CAPeace-Tawhayan batok sa loose firearms.
Sa interview sang Bombo Radyo kay Punong Barangay Roldan Ross Roldan, Liga ng mga Barangay President sang Roxas City, iya ginpahayag nga nagabuligay ang mga barangay officials kag kapulisan sa pag-engganyo sa mga residente nga nagapanag-iya sang wala sang lisensya ukon expired nga armas nga boluntaryo ini nga isurrender.
Suno kay Roldan, importante ang koordinasyon sang mga barangay bangud sila ang mas malapit sa mga residente kag makabulig sa paghatag sang impormasyon kag pagpaathag sa komunidad parte sa kampanya batok sa loose firearms.
Samtang, base sa accomplishment sang Roxas Component City Police Station, naglab-ot na sa 51 ka loose firearms ang na-account halin sa 47 ka barangay sang syudad bilang kabahin sang RTT 3389 kag CAPeace-Tawhayan.
Kalabanan sa mga ini ang short firearms, lakip ang homemade 12-gauge shotguns kag .38-caliber revolvers.
Sa bug-os nga Capiz, naglab-ot naman sa 550 ka loose firearms ang na-recover sang kapulisan halin July 28 tubtob September 23 bilang kabahin sang Project RTT 3389 kag CAPeace-Tawhayan.
