ROXAS CITY – Ginaganyat sang mga manunudlo nagikan sa CAPSU Pontevedra ang tanan nga mga kabataan nga may yara sang deperensya sa ila kaugalingon ilabi na ang mga visually impaired nga mag-upod sa ila programa, kun sa diin dako nga bulig agud mapadayon kag mahatagan sila sang tion nga mapalawig pa ang ila mga ihibalo kag abilidad bilang isa ka indibidwal.
Sa interview sang Bombo Radyo kanday Dr. Mae Dumapig Inclusive Education Course Facilitator, Dr. Matilde Jonel Inclusive Educator Coordinator, Dr. Mary Ann Decrepito BEED Chair kaupod ang ila mga estudyante nga Visually Impaired nga sanday ryan Claveria, Francis Castiloo, lunsay nagdrawar bilang Cum Laude sa kurso nga BEED, Dave Buenavista LET Passer kag Lucia Binibini isa na ka manunudlo sa Ivisan Elementary School, gintuad sang mga ini nga sa una indi madali ang pagsugod sa amu nga programa ilabi na sa pagtudlo sa mg estudyante nga may yara sang kasubong sini nga deperensya apang pinaagi sa ila pagiging mapisan, kag pagtimakas man sang mga estudyante nagresulta ini sang maayo kun sa diin makuhaan kag mahimo nga inspirasyon sang iban nga mga kabataan ilabi na sang mga estudyante.
Suno kay Dr. Dumapig, ang Inclusive Education isa ka programa sang gobyerno kun sa diin ang tanan nga mga estudyante nga may yara sang disability, mahimo nga maka-eskwela sumugod sa elementary tubtob sa koleheyo.
Sa idalum sang nasambit nga programa nagapatigayon sila sang mga nagakalain-lain nga aktibidad agud mahanas ang mga kabataan kag magkabuhi bilang isa ka normal nga estudyante subong man kun paano atubangon ang mga pagtilaw samtang naga-eskwela.
Ginbaugal man sang mga mentors nga nangin maayo ang bunga sang ila pagtimakas kag pagsakripisyo bangud nakapagradwar sila sang mga estudyante nga visually impaired with flying colors.
Ginpasalig man sang mga ini sa mga ginikanan nga indi magkahadlok nga buksan ang ini nga opurtunidad para sa ila kabataan agud magpangabuhi sang instakto kag indi lamang magsalig sa ila tubtob san-o bangud sila nagapati nga masarangan ini nga lab-uton ukon lapawan sang iban pa, apang nagakinahanglan lamang sang suporta kag pag-intindi.
Sa mga luyag nga magpakigbahin sa ila programa bukas ang CAPSU Pontevedra ukon iban nga mga campus sang amu nga unibersidad kag magpakig-angut sa mga manunudlo.
