ROXAS CITY – Nagapabilin nga bukas ang mga kalan-an sa People’s Park, Barangay Baybay, Roxas City sa pihak nga may nagpositibo sa COVID-19 nga tag-iya sang kalan-an sa amo nga lugar.
Apang talalupangdon nga sarado ang duha ka mga kalan-an nga ginapanag-iyahan sang nagpositibo sa coronavirus disease.
Ginpasiguro lamang sang tag-iya sang mga kalan-an sa People’s Park, Barangay Baybay, Roxas City nga istrikto nga ginapatuman ang health protocols kada adlaw sa ila nga restaurant.
Nagapatigayon sang disinfection ang mga personnel kag hugot nga ginadumilian ang pagpasulod sa mga kostumer nga wala nagasuksok sang face mask kag face shield.
Nahibaluan pa nga ginadumilian man sa karon ang pagpasulod sa mga kabataan nga naga-edad 15 anyos panubo kag senior citizens nga naga-edad 65-anyos pataas.
Sa ini nga pamaagi malikawan ang paglapta sang COVID-19 nga nagtuga sang alarma sa mga pumuluyo sa karon bangud sa liwat nga pagtaas sang kaso Sa syudad.
Ginpahayag pa nga gin-isolate kag gin-quarantine na ang staff sang kalan-an sa Barangay Baybay sa diin nagpositibo sa coronavirus disease ukon COVID-19 ang mag-asawa nga tag-iya apang dimalas nga ginbawian sang kabuhi ang isa.
Temporaryo man nga ginadumilian ang pagbaligya sang mga negosyante nga may food carts sa nasambit nga lugar agud malikawan ang paglapta sang naambit nga balatian.
