ROXAS CITY – Indi pa matumod sang mga kapulisan sa syudad sang Roxas ang motibo sang pagpatay kay Sandy Silverio sang Barangay Libas, Roxas City.
Sa interview sang Bombo Radyo kay PSMSgt. Ramil Arcangeles, Information Officer sang Roxas City PNP, ginpahayag sini nga nagapadayon pa ang ila imbestigasyon sa natabo nga pagpangluthang kay Silverio sa Barangay Dayao.
Suno pa kay Arcangeles nga anay drug surrenderee ang biktima kag nagpangatubang man sang kaso nga murder.
Wala naman ginadula sang kapulisan ang posibilidad sa pagpatay kay Silverio amu ang kaangtanan sang iya record.
Dugang pa sini nga wala man sa subong sang may nagatindog nga witness nga nakakita sa mga suspetsado, samtang ginausisa man ang mga lugar nga may nakabutang nga CCTV camera.
Sa karon, ginahulat pa ang desisyon sang pamilya kun ipaidalom sa autopsy ang bangkay sang ila himata.
