ROXAS CITY – Nagsubmit na sang affidavit of undertaking ang mga kapulisan nga may yara sang mga visible tattoo kag wala ginatugutan pa nga magdugang sa anu man nga parte sang lawas.
Matandaan nga nangin dalayon ang pagpatuman sang Philippine National Police (PNP) sa padumili sa visible tattoo sang mga kapulisan.
Sa interview sang Bombo Radyo kay PLt. Swellen Pinalba Capiz Police Provincial Office (CPPO) Information Officer ginpahayag sini nga ginkakas na ang moratorium sa tattoo ban matapos ang maid-id nga pagrepaso sa polisiya rason nga nadayon na ang implementasyon sini.
Suno kay Pinalba nga sa idalum sang Memorandum Circular 2024-023 nga ginaprubahan sadtong Marso 2024, ginapakakas ang tanan nga mga visible tattoo sa mga uniformed personnel.
Indi man sakop suno diri sang bag-o nga pagsulundan ang mga aesthetic tattoo kaangay sang eyebrows, eyeliner kag lip tattoo.
Mahibaluan nga ginhatagan ang PNP sang tatlo ka bulan agud ipakuha ang mga vissble tattoo kag pananglutan nga indi magsunod ang mga ini mahimo sila nga mapasakaan sang kaso nga administratibo.
