ROXAS CITY – Wala sang nabalhag nga ‘untoward incidents’ ang mga kapulisan sa probinsya sang Capiz kag nangin madinalag-on ang una nga adlaw sang klase.
Ini ang ginpahayag ni PMaj. Ruby Magallanes, Public Information Officer sang Capiz Provincial Police Office sang mainterview sang Bombo Radyo.
Suno kay Magallanes, wala sang mga major accidents nga natabo kadungan sang pagbukas sang klase kaina sang aga.
Pahayag sini, nga nagpahamtang ang ila ahensya sang police desk assistance sa kada buluthuan agud mag-asister sa mga estudyante manunudlo kag ginikanan ilabi na kun magtabuk sa karsada kag mamentinar ang ilig sang trapiko.
Talalupangdon suno diri ang ginpatigayon nga psychosocial activities kaangay sang pag-ehersisyo sa aga, orientation sa mga dapat kag indi nagakadapat himuon sa sulod kag guwa sang eskwelahan, pagpatuman sang health standard protocols kag mga prevention tips nga makabulig sa ila pang adlaw-adlaw.
Gintuad sini nga magapadayon ang pag-asister sang mga kapulisan agud mapabilin ang katawhay kag kalinong sa mga buluthoan.
Samtang, lauman man suno diri ang school visitations sang mga otoridad para sa crime prevention tips agud malikawan nga mangin biktima sang anuman nga sahi sang krimen ilabi na subong nga may yara sang asod-asod nga kidnapping sa bug-os nga pungsod.
