ROXAS CITY-Naka-alerto sa karun ang mga katapo sang Roxas City Police Station sa pagbantay sang kalinong kag katawhay subong nga paskuwa kag bag-ong tuig sa bug-os nga siyudad sang Roxas.
Ini ang ginpasalig sang hepe sang Roxas City Police Station nga si Police Lieutenant Colonel Ricardo Jomuad Jr., sang mainterview sang Bombo Radyo.
Sa interview sang Bombo Radyo Roxas kay Jomuad ginpahayag sini nga 95 porsyento sang mga personnel sang Roxas City Police Station ang wala nag-avail sang leaves kag breaks agud makaduty subong nga paskuwa kag bag-ong tuig agud magbantay sang kalinong kag katawhay sang siyudad.
Magluwas diri, may yara pa sang mga personnel nga nagikan sa Police Regional Office -6 agud magbulig sa mga kapulisan sa siyudad.
Suno sa opisyal nga nadeploy ini sila sa mga places of convergence kalakip na sa simbahan kag matawo nga lugar.
Ginpasalig ni Jomuad nga tutukan sang mga kapulisan ang kalinong kag katawhay subong nga paskuwa kag bag-ong tuig.
Samtang nagapati naman si Jomuad nga wala sang mga krimen nga magahinabo sa kapaskuwahan bangud nakaintindi naman ang tanan sa buot silingon sang paskuwa apang ginpakamaayo sini sa publiko nga likawan nga mag-inom sang sobra kag magtuman sang mga ginapatuman nga curfew kag iban pa.
